pescada

Peixe osteíctio, do xénero Merlucius, que pertence á familia dos merlúcidos. Presenta un corpo alongado e cuberto de pequenas escamas. A cabeza é grande, igual ca a boca, que está provista de dentes pequenos e moi afiados. Os dentes da mandíbula superior son fixos, mentres que os da inferior poden inclinarse cara a atrás, de forma que facilitan a entrada do alimento e se opoñen á súa saída. A primeira aleta dorsal é moi curta, mentres que a segunda se estende ao longo de case o resto do corpo. A aleta anal é tamén moi longa, oposta e case igual á segunda dorsal. É un peixe bentónico que vive en zonas de bancos de area e sobre o noiro continental, en augas por debaixo dos 15°C e cunha salinidade comprendida entre o 31 e o 34,5%. Presenta dous tipos de migracións: unha vertical, de ritmo diario, e outra horizontal, de ritmo estacionario. Durante o día permanece preto do fondo e durante a noite desprázase cara a augas medias ou superficiais para alimentarse. Nas migracións estacionais, en tempos cálidos, trasládase desde altas latitudes e dentro de áreas costeiras; en estacións frías volve ás baixas latitudes dentro de augas profundas. Son peixes carnívoros en xeral, aínda que a súa alimentación varía segundo o tamaño do individuo. Así, as larvas e as crías aliméntanse de organismos planctónicos e crustáceos, principalmente copépodos, mentres que os adultos se alimentan fundamentalmente doutros peixes e luras. Rexístranse casos de consumo de exemplares de menor tamaño da mesma especie, polo que se constantan hábitos de canibalismo, que teñen a súa orixe no carácter migratorio e a amplitude das áreas de distribución. O papel que desempeña o canibalismo dentro da súa dieta varía en función da especie, para algunhas dominante e para outras non. En canto ao ciclo reprodutivo, cando chega a primavera ou o verán, aínda que a maioría das pescadas teñen unha época de desova prolongada e outras o fan ao longo do ano, prodúcese unha concentración de machos e femias en zonas pouco profundas, onde ten lugar a fecundación. Está distribuída en amplas zonas, sobre todo as costas de África, América do N e do S, e Nova Zelanda, nos océanos Atlántico, Pacífico, Índico e o Mar Mediterráneo.

ive entre Cabo Cod, Massachusetts (EE UU) e cabo Sable, Nova Escocia, Canadá. Péscase, tanto na súa forma larvaria como adulta, nas costas de Baixa California (México) e de California (EE UU).

Peixe osteíctio, de ata 90 cm as femias adultas e 60 cm os machos. Presenta corpo alongado e lixeiramente comprimido, cuberto de escamas cicloides, de mediano tamaño, que se desprenden facilmente. A cabeza é máis pequena ca no resto das pescadas. A primeira aleta dorsal presenta raios duros, a segunda unha base ampla e bilobulada, e a aleta caudal remata nunha liña recta nos adultos. É de cor gris clara na cabeza e dorso, branca na zona ventral, con reflexos dourados por todo o corpo. As aletas dorsais, peitorais, caudal e o terzo posterior da anal teñen cor gris escura, e os dous terzos anteriores da anal e das ventrais son transparentes. Habita en zonas que van desde Brasil ata o S de Arxentina, en profundidades comprendidas entre os 50 e 500 m, cunha profundidade media duns 200 m. Tolera un rango de temperatura de entre 3 e 18°C, cun óptimo comprendido entre 5 e 10°C. Fundamentalmente é pescada pola frota de altura, que emprega redes de arrastre de fondo. É a base da industria pesqueira arxentina.

Peixe que presenta corpo alongado de ata 118 cm nas femias e 105 cm nos machos. A parte dorsal iníciase cun aplanamento na cabeza ata a altura da metade das órbitas e logo elévase para facerse lixeiramente convexo en toda a súa extensión. Presenta cabeza robusta e boca grande que se estende ata case o extremo das órbitas. Posúe dentes en mandíbulas e vómer; os das mandíbulas en dúas series, máis fortes os da mandíbula superior ca os da inferior. As escamas son pequenas e implántanse debilmente sobre a pel, polo que se desprenden con facilidade. É de cor gris prateada, máis escura no dorso e máis clara na rexión ventral. Aliméntase doutros peixes e crustáceos, e reprodúcese entre finais do inverno e comezos da primavera. É unha especie relativamente lonxeva (ata 24 anos en femias e 20 anos en machos). Para a súa captura a frota de altura emprega redes de arrastre. É propia das augas de América do Sur e de Nova Zelanda.

Pescada que presenta corpo alongado e fusiforme, coa cabeza esmagada e grandes órbitas. É de cor gris prateada, máis escura no dorso e con tons brancos no ventre. Vive nos mares que van desde o N de Perú ata o S de Chile.

Pescada que vive en profundidades comprendidas entre os 18 e os 500 m. Aliméntase fundamentalmente de pequenos peixes, crustáceos e cefalópodos. A desova ten lugar entre os meses de xaneiro e marzo. A súa cor negra ou moi escura do lombo e dos laterais diferénciana do resto das pescadas. Vive nas costas de Senegal.

Pescada en que a desova peláxica das femias depende do seu tamaño (pode chegar a ser de 50.000 a 80.000 ovos por femia). O seu crecemento é relativamente rápido, especialmente durante os primeiros anos de vida. Poden chegar a vivir arredor dos 15 anos, en fondos oceánicos e zonas costeiras, en profundidades que poden chegar aos 1.000 m. Distribúense polas costas do Pacífico setentrional.

Peixe osteíctio, da orde dos gadiformes, que poden acadar os 180 cm de lonxitude, aínda que é moi raro que sobrepase os 100 cm. Presenta corpo fusiforme, alongado, pouco comprimido lateralmente, de sección redondeada e cuberto de escamas caducas e pequenas. A cabeza é aguda e alongada, anteriormente deprimida por unha fosa que se sitúa na parte anterior, bordeada por cristas frontais que conflúen noutra occipital. A boca é grande e oblicua, e presenta maxilares con dentes agudos e pequenos en dúas ou tres series, dos que a serie interna son de maior tamaño. Os da mandíbula superior son fixos, mentres que os da inferior poden inclinarse cara a atrás, de forma que facilitan a entrada das presas na boca e se opoñen á súa saída. Posúen vómer con dentes e palatino sen eles. As dúas aletas dorsais están separadas unha da outra por un espazo relativamente grande; a primeira é máis curta e alta ca a segunda, e só presentan unha aleta anal que é oposta e escotada e máis curta ca a dorsal segunda. As aletas peitorais son arredondadas e ben desenvoltas, e as pélvicas presentan unha lonxitude moi semellante a estas. A liña lateral é horizontal na parte posterior e corcovada na anterior. É de cor gris escura con pintas negras, ventre e flancos prateados. A parte dorsal e lateral cefálica é máis escura ca o resto do corpo. As aletas dorsais son de cor gris e transparentes, como a anal branca. A caudal é negra e as peitorais dunha cor próxima ao negro, como o interior da boca e dos opérculos. Vive a maior parte do tempo nas marxes da plataforma continental, entre os 70 e os 370 m de profundidade (pode chegar aos 1.000 m). As crías están en zonas menos fondas e os adultos nas máis profundas. No verán achégase máis á costa. Xeralmente está no fondo, aínda que pola noite sobe á superficie para buscar alimento, que varía segundo a idade e a dispoñibilidade de comida. As crías nútrense de crustáceos, mentres que os adultos se alimentan principalmente de peixes (xardas, bocartes, arenques e xurelos). Rexistrouse incluso o consumo de exemplares de menor tamaño da mesma especie, polo que se constatan certos hábitos de canibalismo. En canto á reprodución, son peixes peláxicos que se aparean entre o final do inverno e a primavera, momento en que se produce unha concentración de machos e femias en zonas pouco profundas e escasas de alimento. O período de desova é prolongado e varía coa poboación. Os ovos e larvas son planctónicos ata que acadan o estado de xuvenil, momento en que marchan preto do fondo, onde están os adultos. As femias acadan a madureza aos dous anos e os machos aos tres; esta primeira fase caracterízase por un crecemento moi rápido que continúa cun período -ata os 7 anos-, onde se acentúa, para facerse case nulo en diante. Unha vez ten lugar a reprodución, avanzan a zonas moito máis ricas en alimento co fin de acumular as reservas precisas para o seu crecemento e reprodución. Poden vivir ata 20 anos. A pescada europea é un peixe que se xunta en cardumes relativamente numerosos, feito que propiciou o desenvolvemento de importantes pesqueiras en diversos lugares do mundo. Distribúese polo Mar Mediterráneo, o Báltico e o Atlántico oriental, desde Marrocos ata Islandia e Noruega.

Pescada que presenta o lombo de cor prateada con tons marróns e ventre claro. As escamas son de maior tamaño ca no resto das pescadas. Vive nas augas do sur de África e na zona meridional de África.