Plessis de Richelieu, Armand Jean du

Estadista e cardeal. Coñecido como o cardeal Richelieu, estaba destinado á carreira militar pero abandonouna para ocupar o beneficio familiar do bispado de Luçon (1606). Deputado do clero nos Estados Xerais de 1614 e apoiado polo partido “devoto”, conseguiu a través de Concino Concini, home de confianza da raíña rexente María de Medici, ser nomeado secretario de Estado (1616). Proclamada a maioría de idade de Luís XIII, foi nomeado cardeal en 1622, e posteriormente xefe do Consello Real (1624). Durante o seu ministerio político sufocou as conspiracións da alta nobreza e enfrontouse aos hugonotes, que conseguiu eliminar de La Rochelle e Languedoc (1627-1629). Fomentou o absolutismo rexio fronte ao poder da aristocracia e cimentou o prestixio de Francia como potencia europea. Creou unha frota de guerra para enfrontarse a Inglaterra (Guerra de La Rochelle), controlar os portos da coroa francesa e protexer o gran comercio. A combinación dunha política antihugonotes no interior do estado, pero ao mesmo tempo non procatólica ou antihabsburgo, en Europa, enfrontouno co partido “devoto”, que foi finalmente derrotado en 1630. A partir de entón subordinou toda a política ás esixencias da loita contra os Habsburgo e con este obxectivo esforzouse en vertebrar unha administración centralizada e en promover unha propaganda monárquica defensora da súa política. Por mor das necesidades financeiras e problemas económicos da política bélica, houbo resistencias entre os nobres, a Igrexa, os parlamentos provinciais e as clases populares. Aliado coas Provincias Unidas e Savoia, declarou a guerra a Filipe IV de España (1635) e entrou na Guerra dos Trinta Anos. En 1638 as tropas francesas asediaron Hondarribia, pero fracasaron, o que os levou a probar sorte pola fronteira catalá e conseguiron ocupar Salses (1639). A ruptura de relacións de Catalunya con Madrid levou á alianza dos cataláns cos franceses, que derrotaron as tropas españolas (Batalla de Montjuïc, 1641). Despois asegurou a ocupación do Condado do Rosellón, confirmada no Tratado dos Pireneos (1659).

Cronoloxía