réptil

Relativo ou pertencente aos réptiles.

Vertebrado da clase dos réptiles.

Clase de vertebrados poiquilotermos, co corpo cuberto dun tegumento córneo, provisto de catro extremidades pentadáctilas con dedos acabados en poutas (agás nos ofidios), esqueleto osificado, un só cóndilo occipital e respiración pulmonar. A pel, igual ca a respiración, está completamente adaptada á vida en terra firme e por iso está case desprovista de glándulas e forma un verdadeiro exoesqueleto de escamas ou placas córneas que nos escamosos e nos rincocéfalos muda periodicamente e noutros, como os crocodilianos e os quelonios, medra co animal. Excepto nos ofidios e nalgúns grupos de sauros, teñen dous pares de extremidades iguais pentadáctilas. Son unisexuais, con fecundación interna mediante órganos copuladores específicos e ovíparos, excepto algunhas especies de ofidios ovovivíparos e algúns sauros vivíparos. Os ovos son incubados xeralmente ao sol. O desenvolvemento é directo. Son carnívoros ou ben herbívoros, de baixo metabolismo; os que habitan en zonas temperadas teñen épocas de letargo. Os réptiles habitan en zonas cálidas e temperadas, ben colonizando medios terrestres ou acuáticos. Orixináronse no Carbonífero e acadaron o seu máximo desenvolvemento durante a era Secundaria, en que colonizaron os tres medios (aéreo, acuático e terrestre) e acadaron nalgúns casos, como o dos dinosauros, un tamaño considerable. As formas viventes divídense en dúas subclases: anápsidos (tartarugas) e diápsidos á que pertencen os lepidosauros (tuatara, saurios, anfisbénidos e serpes) e os arcosauros (crocodilos).