Rodin, François-Auguste

Escultor. Discípulo de Jean-Baptiste Carpeaux, Bayre e Carrier-Belleuse, residiu en Bruxelas (1871-1875) como axudante de Carrier e como socio de Antoine-Joseph Van Rasbourg, con quen realizou o monumento ao burgomestre Loos do parque de Anveres. Posteriormente viaxou a Italia (1875), onde o impresionou a obra de Miguel Anxo. No Salon de 1877 a súa L’âge de bronze causou polémica, e no de 1879 o seu Jean-Baptiste foi premiado. En 1880 un encargo oficial permitiulle iniciar La porte de l’enfer, onde incorporou réplicas doutras obras que xa realizara pensando nela, como Penseur (1880), Baiser (1889) ou L’enfant prodigue (1889). Realizou os polémicos Monument à Victor Hugo (1897) e Monument à Balzac (1897) e o famoso grupo Monument aux bourgeois de Calais (1884-1886). Foi tamén un extraordinario retratista (Falguière, 1897) e da súa extensa produción destacan La fontaine (1885), onde prefigurou o modernismo, Celle qui fut la belle heaulmière (1885), un expoñente do realismo, e La cathédrale (1909), onde as mans entrelazadas que a forman constitúen unha obra mestra do simbolismo. O seu pensamento estético reuniuse no volume L’art (1911), recompilado por Paul Gsell.

Cronoloxía