Salinas Rodríguez, Galo

Escritor. Encadrado na xeración que promoveu o Rexurdimento (1868) en Galicia, destacou como dramaturgo e pode considerárselle o iniciador do teatro contemporáneo galego. Actuou como recuperador da Escuela Regional Gallega de Declamación (1903-1904), da que foi presidente e que iniciou a súa andaina coa estrea da obra Filla...!, do propio Galo Salinas. Participou no parladoiro da Cova Céltica e fundou o seu órgano de expresión, a Revista Gallega. Semanario de literatura e intereses regionales (1895-1907). Autor de El Regionalismo gallego. Estudio social (1892) e dun Hino popular regional (1893), con música de Varela Silvari, da súa produción teatral destacan A torre de Peito Burdelo (1891), premiada polo Liceu Brigantiño en 1890; Filla...! (1892), premiada pola Sociedad Económica de Amigos del País en Pontevedra en 1892; e Bodas de ouro (1921), estreada polo coro Cántigas da Terra. Outros textos que foron estreados pero non publicados son Sabela (1903), Feromar (1922), Copas e bastos (1922) e Entre o deber e o querer (1923), ademais doutros inéditos. En castelán escribiu Lo que puede el honor (1900), Gloriosa derrota (1904) e La huelga (1911).

Cronoloxía