Senado

Órgano lexislativo de España que se mantivo vixente en diversos períodos da historia e que se restableceu na Constitución de 1978. Forma xunto co Congreso de los Diputados as Cortes Generales.
Composición, funcionamento e funcións
O Senado é a cámara de representación territorial. Segundo a súa procedencia, os seus membros son de dous tipos. Un primeiro grupo está formado por 208 senadores elixidos directamente polos cidadáns sobre circunscricións plurinominais de base provincial. En cada provincia peninsular elíxesen catro senadores, nas illas maiores (Gran Canaria, Mallorca e Tenerife) tres senadores, nas restantes illas ou agrupacións (Ibiza-Formentera, Menorca, Fuerteventura, Gomera, Hierro, Lanzarote, La Palma) un senador, e nas cidades autónomas de Ceuta e Melilla un senador en cada unha. O segundo grupo está formado polos senadores elixidos polas comunidades autónomas, que elixen un senador e outro por cada millón de habitantes, feito que deu como resultado que na lexislatura 2004-2008 se elixisen 51 senadores. Os órganos rectores son o Presidente, a Mesa, a Xunta de Portavoces e a Deputación Permanente. Estivo presidido por Antonio Fontán Pérez (1977-1979), Celicio Valverde Mazuelas (1979-1982), José Federico de Carvajal Pérez (1982-1986, 1986-1989), Juan José Laborda Martín (1989-1993, 1993-1996), Juan Ignacio Barrero Valverde (1996-1999), Esperanza Aguirre Gil de Biedma (1999-2000, 2000-2002), Juan José Lucas Giménez (2002-2004) e desde 2004 por Francisco Javier Rojo García. Funciona en comisións (lexislativas, non lexislativas, mixtas, de investigacións, especiais, conxuntas, conxuntas Congreso-Senado), en relatorios de estudos e en sesións plenarias. Ten funcións de integración territorial, lexislativas, de control e impulso político, e de control da política exterior.