² solda

Planta herbácea perenne, rizomatosa, con follas palmaticompostas, con tres folíolos, ás veces cinco, obovados, dentados e pilosos no envés, con flores tetrámeras amarelas, dispostas en cimas terminais pouco densas e froito en poliaquenio. Florece desde a primavera ata comezos do outono en landas, prados e bosques, especialmente sobre substrato silícico, en toda Europa, excepto na rexión mediterránea, onde é pouco frecuente. Emprégase como planta medicinal. OBS: Tamén se denomina sete na rama, solda brava ou solda do monte.