Sucesión de Austria, Guerra de

Conflito bélico europeo que estalou coa morte sen descendencia masculina do Emperador Carlos VI de Austria en 1740. As potencias europeas negáronse a recoñecer a súa filla María Tareixa como sucesora. O conflito comezou coa conquista de Silesia por parte de Federico II de Prusia (1740-1741). Deseguido, Francia, España, Baviera e Saxonia uníronse ao vencedor e formaron a Liga de Nymphenburg. María Tareixa non puido impedir a ocupación da Alta Austria e de Bohemia por parte das tropas franco-bávaras (1741) nin a elección e proclamación en 1742 de Carlos Alberte de Baviera como emperador (Carlos VII). Non obstante, conseguiu afastar temporalmente do conflito os exércitos prusianos. O progresivo illamento de Francia determinou o reforzo da súa alianza con España (Segundo Pacto de Familia, 1743) e a volta de Prusia á guerra (1744). En 1748 chegouse á paz en Aquisgrán. Francia restituíu todos os territorios conquistados e conformouse con recuperar as colonias perdidas, Federico II asegurouse a posesión de Silesia e o infante Filipe, fillo pequeno de Filipe V de España, recibiu os ducados italianos de Parma, Piacenza e Guastalla. Aínda así, os conflitos rexurdiron na Guerra dos Sete Anos.