tocar

1. v t

   Facer que unha parte do corpo entre en contacto con alguén.

   Ex: Tocoulle a man para espertalo.

2. v t

   Estar unha cousa a carón doutra.

   Ex: O coche case toca a parede do garaxe. OBS: Emprégase tamén seguido das preposicións en e con. Ex: A árbore toca no pau da luz.

3. v t

   Facer referencia a un tema determinado sen facer del o tema principal.

   Ex: Na súa intervención non tocou o tema.

4. v t

   Realizar modificacións ou variacións en algo.

   Ex: Cambia o título pero non toques a redacción.

5. v t

   Facer soar un instrumento musical.

   Ex: Toca o clarinete desde moi pequeno. OBS: Nalgunhas construcións omítese o complemento e adquire valor absoluto. Ex: Toca nunha orquestra sinfónica.

6. v t

   Executar unha peza de música.

   Ex: A orquestra tocou a Sétima Sinfonía de Mahler. OBS: Nalgunhas construcións omítese o complemento e adquire valor absoluto. Ex: Tocou no certame de música.

7. v t

   Aproximarse moito a algo.

   Ex: O actor fixo unha interpretación que tocou a perfección. OBS: Tamén se emprega seguido da preposición en. Ex: Debe estar tocando nos oitenta anos.

8. v t

   Facer escala un barco ou un avión.

   Ex: O barco que vai ás illas Cíes toca o porto de Cangas. OBS: Emprégase tamén seguido da preposición en. Ex: É un aeroporto en que tocan numerosos voos transatlánticos.

9. v i

   Avisar algo mediante sinais acústicos.

   Ex: A alarma do reloxo tocou ás nove.

10. v i

    Corresponder algo a alguén por sorte ou nunha repartición.

    Ex: Tocáronlle dous millóns na lotaría.

11. v i

    Corresponder a alguén o momento de facer algo.

    Ex: Tocábache, pero pasouche a vez.

12. v i

    Afectar algo a alguén.

    Ex: Sempre amosou interese por todo o que tocaba aos dereitos humanos.

13. v i

    Producir o seu son un instrumento.

    Ex: Ten na casa un piano que toca moi ben.

Frases feitas

• Tocar a morto. Emitir as campás o son que anuncia a morte de alguén.

• Tocar os dentes. Bater os dentes por mor do frío.