Torre, castro da

Castro situado no cumio dun esporón de ladeira en Seoane do Courel. Escavado na década de 1990 por A. Álvarez Núñez, estivo habitado entre os ss II e IV. A súa planta, de forma oval, estaba defendida por unha muralla que rodeaba a croa, e contaba ademais cun sistema de pedras fincadas ao longo da ladeira, un foso en V na parte posterior do esporón e dúas torres que flanqueaban a entrada. Para acceder á croa construíuse un corredor lousado, de 1,5 m de ancho e 6 m de lonxitude. No seu interior apareceron restos de vivendas de plantas circulares e cuadrangulares, que poden estar acaroadas á muralla e que xa presentan portas de entrada de doada identificación. Algunhas conteñen no interior divisións amodo de patios e vestíbulos, bancos de pedra corridos acaroados ás paredes, fogares compostos por unha ou varias lousas e escaleiras que permiten o acceso ao exterior da cabana cando esta se atopa nun nivel máis alto ca o seu fondo. Apareceu tamén un alxibe rectangular escavado na rocha, que recollía a auga da chuvia.