Ulloa

Liñaxe galega que tivo a súa orixe en Vilamaior de Ulloa, lugar do que aínda non se concretou a zona exacta de localización, pero que puido estar preto de Melide. Lope Ruiz de Ulloa , neto de Fernando Pérez, conde de Traba, encabezou a liñaxe. Casou con Tareixa Fernández de Trava e deles proceden os sucesores desta liñaxe. De Diego García de Ulloa , comendador da orde de Santiago, proceden todas as ilustres casas de Extremadura. Os deste apelido foron señores de Ulloa, Monterroso e Deza e condes de Monterrei, ademais de señores de Coca e Alaejos, condes de Ayala e señores e marqueses da Mota, entre outros. Trae por armas, escudo axadrezado de ouro e goles, cargado de dúas faixas de ouro, de quince pezas (3 × 5). Outro trae, escudo axadrezado de ouro e goles, cargado de tres faixas de ouro, de quince pezas (3 × 5).