² vela

1. s f

   Acción de permanecer esperto durante o tempo que se dedica normalmente a durmir.

2. s f [RELIX]

   1. Espazo de tempo de pregaria, sobre todo colectiva, que se fai durante a noite. Coñecida desde os primeiros séculos do cristianismo, debeu ser introducida pola crenza de que a segunda chegada de Cristo sería durante a noite. Iniciábase coas vésperas e adoitaba pecharse coa celebración eucarística. Dedicábaselle toda a noite, especialmente por Pascua (vela pascual), nas festas dos mártires e unha boa parte de domingos.

   2. Práctica devocional que consiste en pregar por horas ou por quendas ante o Santísimo, exposto ou non no monumento, tanto de noite coma de día.

3. vela de armas [HIST]

   Noite que o aspirante tiña que pasar na igrexa en oración como preparación para a cerimonia que o investía cabaleiro.

Frases feitas

• Andar á vela. Espreitar algo ou a alguén.

• En vela. Sen durmir.