Vespuci, Amerigo

Navegante e comerciante. Ao servizo dos Medici desde 1484, en 1492 chegou a Sevilla. Colaborou na provisión e frete dos barcos enviados ás Indias e participou no avituallamento da terceira expedición de C. Colón. En 1497 iniciouse na navegación. Segundo a súa obra Lettera di Amerigo Vespucci delle isole nuovamente trovate en quatro suoi viaggi, realizou catro viaxes. Na primeira (1497) formou parte da expedición comandada por J. Díaz de Solís que chegou ao mar das Antillas, probablemente dentro da actual Costa Rica, bordeou a península de Yucatán, percorreu o golfo de México e remontou Florida, dentro da baía de Chesapeake. Regresou en 1498. A segunda (1499-1500) realizouna baixo o mando de Alonso de Ojeda e coa participación de Juan de la Cosa. A expedición bordeou Trinidad, Margarita, a costa das Perlas, Curação e a península da Guajira, e acabou na Hispaniola. En 1501 pasou ao servizo do Rei Manuel I de Portugal, e realizou a terceira viaxe, comandada por Gonçalo Coelho, con destino en Brasil e regresou en 1502. A última viaxe (1503-1504) tiña como finalidade encontrar un paso cara á India e intentar arribar ao país das especias, ocupar o territorio, colonizalo e establecer alí unha factoría. Chegou ata Brasil e percorreu unha parte da costa brasileira. Ao redor de 1505 regresou a Castela. Conseguiu a naturalización nos reinos de Castela e León, e gozou do título de capitán, ata que en 1508 o monarca castelán o nomeou piloto mayor da Casa de Contratación. Del deriva o nome do continente, América.

Cronoloxía