Mondariz

Revista ilustrada editada en Madrid a partir do 1 de maio de 1915. Cesou o 20 de xullo de 1922. Publicada polo Gran Hotel Balneario de Mondariz, levou o subtítulo “Revista mensual ilustrada. Suplemento de La Temporada”. Tratouse dunha das publicacións destacadas da época tanto pola súa calidade como polo cadro de colaboradores: M. Murguía, Rey Soto, Pérez Constanti, Uxío López-Aydillo, R. Cabanillas, Bieito Losada ou Luís Taboada. Incluíu biografías de médicos destacados, poemas, artigos de medicina e, a partir do 20 de marzo de 1920, un suplemento chamado La Hoja Hidrológica, dirixida polo doutor Rodríguez Pinilla.