xerador -ra

Que produce ou xera algo.

Máquina, aparato ou dispositivo que produce enerxía eléctrica cunha tensión ou corrente dunhas características determinadas. Os máis empregados son os xeradores dinamoeléctricos que se empregan na produción industrial de electricidade. Para a xeración de corrente alterna empréganse o alternador, e de corrente contínua, a dínamo. Os xeradores electroquímicos, como pilas e acumuladores, teñen un uso máis restrinxido. Os xeradores electrostáticos, desenvoltos a partir do electróforo de Volta, producen electricidade por indución electrostática.

Dispositivo que se emprega en física atómica para producir partículas. Os máis importantes son os xeradores de neutróns, que se diferencian segundo a forma en que se produce a reacción nuclear: bombardeo de ións acelerados sobre un elemento lixeiro, bombardeo de electróns sobre un elemento pesado, incidencia de partículas γ sobre berilio e fisión nun reactor nuclear.