afeitar

1. v t e pron

   Rasurar a barba, o bigote ou o pelo da cara cunha navalla, máquina eléctrica ou afeitadora, coitela, etc.

   Ex: Onte o barbeiro afeitoume a barba. Afeitouse a barba e agora parece que ten cara de cu.

2. v t

   Cortar o pelo que nace en calquera parte do corpo.

   Ex: Afeitou as pernas para poder ir á praia.

3. v t e pron

   Embelecer(se) con afeites.

   Ex: Afeitou o pelo con flores. Afeitouse toda para ser a atención da festa.

4. v t

   Cortar as pólas das árbores.

   Sinónimos: decotar, demoucar, derramar, esmoucar, espolar. Confrontacións: podar.
5. v t

   Cortar a rentes o toxo, as silveiras, fentos, etc dun terreo.

   Ex: Afeitaron o toxo porque xa estaba moi alto.

6. 1. folla de afeitar

      Folla de aceiro, delgada e flexible, cun ou dous cortes que, fixada á máquina de afeitar, serve para rasurar a pel.

   2. máquina de afeitar eléctrica ou afeitadora [TECNOL]

      Aparello eléctrico que permite afeitar ou afeitarse en seco. Inventada en 1931 polo norteamericano Schick, consta dunha ou máis coitelas, cun corte simple ou múltiple, que xira ou se despraza con movemento alternativo, pola acción dun pequeno motor eléctrico, por baixo dunha lámina fina metálica, provista de múltiples furados, que deixa pasar o pelo e orienta o corte.

   3. maquiniña de afeitar [TECNOL]

      Aparello para afeitar. Consta dun mango no extremo do que se coloca unha folla de afeitar ou gillette (polo nome do seu inventor) ou unha coitela dun só uso.

Frases feitas

• Afeitar a alguén sen navalla. Molestar a alguén, darlle unha malleira.

• Afeitar a un en seco/contra o sol. Amolar.

Refráns

• Máis vale mal afeitado que ben esfolado.
• O día que non me afeitei, veu á miña casa quen menos pensei.
• Se queres un día bo, aféitate; un mes bo, mata porco; un ano bo, casa; e un sempre bo, faite crego.