Agudelo, Igrexa de San Martiño de

Igrexa da parroquia homónima do concello de Barro. Románica de nave única e capela semicircular, conserva interesantes temas esculpidos, tanto nos capiteis do seu interior (nun deles aparece un músico), como nos da porta principal e o seu tímpano, con figuras humanas e animais. Na súa porta occidental denótase unha clara influencia da arte do obradoiro mateano, polo que debeu de ser construída cara ao final do s XII.