Alonso Padín, Laura

Soprano. Iniciou os seus estudos musicais no Conservatorio de Santiago de Compostela, para continuar na Escola Superior de Canto de Madrid co barítono Antonio Blancas e no 1993 comezar na Hochschule für Musik (Karlsruhe, Alemaña). Pertence á Escola de Ópera de Karlsuhe (1994-1997). No 1997 ingresou no Aalto Theater de Essen (Alemaña), onde levou a escena óperas baixo a dirección de Stefan Soltesz ou Emilio Sagi. Actuou coa Filharmónica de Baden-Baden, coa Young Israel Philharmonic e no 1996 como solista nos Carmina Burana de Carl Orff, xunto ao Orfeón Terra A Nosa. Dende ese ano, colabora coa Orquestra Sinfónica de Galicia.

Levou a escena, entre outros papeis, Pamina, de Die Zauberflöte (A frauta máxica) e Sophie, de Der Rosenkavalier (O cabaleiro da Rosa). Recibiu o premio á Mellor Artista Moza do Aalto Theater de Essen (1998). Gravou un amplo repertorio da canción galega de concerto con pezas de Xoán Montes, Chané, Marcial del Adalid, Andrés Gaos e outros mestres (1999).

Obtivo numerosos premios como o 1º premio do Alfredo Kraus International Singing Competition, 1º premio do Internationalen Gesangswettbewerb von Verviers ou o Diapason d'Or pola gravación de Giulio Cesare in Egitto, de Antonio Sartorio.

Cronoloxía