anatasa

Óxido de titanio, TiO2, chamado tamén octaedrita. Cristaliza no sistema tetragonal; os cristais, pequenos, poden ser bipiramidais ou arredondados e están implantados de xeito disperso; a súa exfoliación é perfecta, ten cor negra, marrón ou, raramente, incolora e brillo diamantino. Ten dureza 5,5-6 e peso específico 3,9. O TiO2 é trimorfo: as outras dúas formas de mineralización son o rutilo e a brookita.