Arethusana

Xénero de bolboretas da familia dos satíridos ao que pertence a especie A. arethusa. O adulto desta especie é de cores castañas e presenta un ocelo negro no ápice da á superior. As eirugas teñen liñas lonxitudinais de varios tons de marrón e aliméntanse do xoio e doutras poáceas dos xéneros Dactylis e Poa. Vive no monte baixo, áreas abertas e pedregais do norte de África, Europa e Asia Central. En Galicia está presente a subespecie dentata.