axencia

Empresa dedicada a xestionar asuntos alleos ou prestar servicios como intermediaria.

Lugar onde está establecida unha empresa dedicada a xestionar asuntos ou prestar servicios.

Oficio ou encargo de axente.

Establecemento secundario dunha empresa.

Contrato polo que unha parte asume de forma estable e permanente o encargo de levar adiante, en nome e por conta doutro e a cambio dunha retribución, a conclusión en exclusiva de contratos nunha zona determinada.

Persoa física ou xurídica que de xeito habitual e retribuído, e en posesión do título correspondente presta servicios de orientación, información e asistencia turística. Atende a viaxeiros e turistas tanto en materia monumental, artística, histórica ou ofrece datos sobre comunicación e aloxamento e, en xeral, de canto poida ser de interese para o coñecemento do patrimonio turístico e a utilización dos medios existentes ao servizo do público. En Galicia correspóndelles este labor aos chamados Centros de Iniciativas Turística (CIT), xeralmente promovidos polos concellos ou por mancomunidades.

Empresa de servicios que dispón de persoas cualificadas no eido da comunicación e que desenvolven, mediante contrato, tarefas especializadas para outras institucións. Entre os profesionais que ofrece este tipo de empresa, ademais de modelos e actores para anuncios publicitarios ou organización de actos públicos, poden dispor de fotógrafos, directores de cine ou calquera outro artista ou profesional relacionado co mundo publicitario e das relacións públicas.

Establecemento ou empresa que ofrece información de carácter xeral ou sobre un tema específico a través dunha rede de telecomunicacións como a Internet.

Organización que centraliza as informacións periodísticas recollidas polos seus correspondentes nos lugares onde se producen os acontecementos, clasificándoas e transmitíndoas ás empresas subscritas (xornais, centros de televisión, emisoras de radio, etc).

Empresa comercial dedicada a crear, planificar e difundir campañas publicitarias previamente contratadas por un anunciante. As súas actividades concéntranse na producion de anuncios, planificación de medios e deseño de plans de comunicación. A estrutura dunha axencia está en estreita dependencia co alcance dos servicios que ofrece, coa dimensión da axencia e coa carteira de clientes cos que traballa. Tomando como modelo unha axencia grande, os diferentes departamentos que a forman son: departamento de contas, órgano que une a axencia co cliente a través do executivo de contas, que ten a función de saber qué tipo de actividade ten que desenvolver a axencia para o seu cliente, así como asesoralo ao longo da campaña; departamento de investigación e márketing, que obtén información sobre o consumo do produto ou o servizo co que está a traballar a axencia, datos sobre o produto e investigacións sobre a competencia; departamento creativo, que ten a misión de elaborar a mensaxe publicitaria dende a súa concepción ata a súa produción final; departamento de medios con dúas tarefas: a planificación e a contratación dos medios. Dispón tamén dun departamento de tráfico e control, que se ocupa de controlar todo o proceso de comunicación. Existen diferentes tipos de axencias. A Axencia de Servicios Plenos é aquela que estende a súa actividade a calquera ámbito da comunicación social. Unha Axencia de Servicios Especializados ou Boutique está especializada nun ou varios servicios determinados, como por exemplo a creatividade publicitaria. Unha Axencia Interna pertence ao propio anunciante para o que traballa. As Axencias Exclusivas de Medios comercializan e xestionan o espazo publicitario que venden os medios de comunicación. As Centrais de Compra de Medios ocúpanse da compra masiva de espacios e tempos publicitarios coa finalidade de revendelos aos anunciantes ou ás axencias. Existen outras axencias especializadas en diversos servicios de márketing (márketing ou publicidade directa, márketing promocional, especializadas en patrocinio e promoción, en relacións públicas e actividades semellantes).

Empresa especializada na comunicación e entendemento co público e cos medios de comunicación. Os traballos, case que sempre realizados por expertos en comunicación institucional, consisten en programar, dirixir e xestionar de forma sistemática e profesional, todas as actividades con posible repercusión social da entidade que a contrate, co obxectivo xeral de comunicar eficazmente á opinión pública o qué fai, cómo o fai e para qué o fai.

Empresa de servicios dedicada ao traslado de mercadorías dun lugar a outro.

Compañía que actúa na mediación financeira e noutros servicios que poden formar parte dunha bolsa. As axencias, a diferenza das sociedades de valores, só poden actuar por conta doutros.

Empresa establecida en forma de sociedade mercantil, anónima ou limitada, que en posesión do título ou licenza correspondente, dedícase profesional e comercialmente en exclusividade ao exercicio de actividades de mediación e/ou organización de servicios turísticos, podendo empregar medios propios na prestación dos mesmos. As axencias de viaxes xurdiron no s XIX. A máis antiga é a Thos Cook & Son, fundada en Inglaterra no 1841. As principais actividades dunha axencia de viaxes son: a) mediación na venda de billetes e reserva de prazas en toda clase de medios de transporte; b) reserva de habitacións e servicios en establecementos e aloxamentos turísticos; c) organización, venda e realización de servicios combinados e viaxes “a forfait”; d) actuación por delegación e corresponsalía doutras axencias nacionais e estranxeiras, para a prestación no seu nome de calquera destes servicios. Por razón da súa actividade e o ámbito da mesma, clasifícanse en axencias por xunto, as que proxectan, elaboran e organizan toda clase de servicios e paquetes turísticos para ofrecelos ás axencias polo miúdo, sen poder ofrecer os seus produtos directamente ao consumidor; e axencias polo miúdo, as que, ou ben comercializan o produto das axencias por xunto, ou ben proxectan, elaboran, organizan e/ou venden toda clase de servicios e paquetes turísticos directamente ao usuario, sen poder ofrecer os seus produtos a outras axencias. En Galicia operan 7 axencias por xunto e 95 axencias polo miúdo.