Bastida

Liñaxe procedente de Monforte de Lemos ou de Lleida, segundo os investigadores. O seu tronco seica foi Xoán Ruíz Bezudo. Estendeuse por varias rexións españolas e Rui Nuñez de Bastida estableceu o seu casarío na torre de Bastida, preto de Monforte de Lemos. As súas armas levan: en campo de sinople, unha torre cadrada, de prata aclarada de ouro; á súa destra, un león, tamén de ouro, atado cunha cadea de azul á porta da torre; á sinistra, unha bastida do mesmo metal, apoiada nunha das ventás da torre, e na bastida cabaleiros armados portando lanzas de azul, co ferro de ouro, entrando e saíndo da torre.