Belfort

Cidade do Franco-Condado, capital do departamento do Territorio de Belfort, Francia (50.125 h [1990]). O núcleo primitivo foi fundado polos romanos sobre un outeiro, lugar fortificado onde na Idade Media se construíu o castelo da Casa dos Bar, que pasou á Coroa de Francia polo Tratado de Westfalia (1648). Belfort acadou sona polos tres duros asedios que tivo que soportar: os de 1814 e 1815, durante as guerras napoleónicas, e o de 1870 durante a Guerra Franco-Prusiana. Logo da derrota francesa permaneceu baixo ocupación alemá ata 1873.