berberecho

Molusco lamelibranquio do xénero Cardium da familia dos cardítidos. Caracterízase por ter a cuncha moi convexa, formada por dúas valvas iguais, percorrida por costelas radiais que poden levar espiñas. É un animal filtrador que vive enterrado a poucos centímetros en fondos de area lamacenta e cascallo, dende a franxa infralitoral ata os 10 m de profundidade. Nas costas atlánticas galegas pódense atopar catro especies: C. edule, C. tuberculatum, C. glaucum, coñecido como berberecho azul ou birollo, e C. echinatum, coñecido como berberecho macho . Recóllense co raño a pé ou dende embarcacións, e cómpre depuralos antes de inxerilos. Consómense preferentemente en conserva ou en guisos: por exemplo, con arroz ou como gornición en guisos de peixe, en empanada de millo ou de trigo e, se son de maior tamaño, ao vapor e incluso á prancha.