bile

Produto da secreción externa das células hepáticas de moitos vertebrados. É un líquido claro, amarelado e amargo. A bile elaborada polas células poligonais hepáticas, transpórtase a través dos condutos biliares intrahepáticos cara aos condutos hepáticos (cístico e colédoco) e almacénase na vesícula biliar. Unha vez vertida ao intestino, e grazas aos sales biliares, facilita a dixestión e a absorción das graxas. Tamén actúa favorecendo a absorción de colesterina e de vitaminas liposolubles, e como axente antiséptico e bacteriostático sobre a flora microbiana intestinal. A bile componse esencialmente de auga, sales biliares, pigmentos biliares (bilirrubina e biliverdina), ácidos graxos, lecitina, mucina e colesterina. Pódese distinguir unha bile A ou hepática, fluída e de cor dourada, dunha bile B ou vesicular, máis concentrada e de cor verdosa.

Mal carácter característico de quen ve unicamente a parte negativa das cousas ou de quen ten sempre mal humor.

Antigamente, nome co que se coñecía o soro do sangue.

Produto da secreción do fígado dos bóvidos. Emprégase como colagogo, e tamén en microbioloxía, agregado a algúns medios de cultivo.

Antigamente, nome co que se designaba o coágulo sanguíneo.