Blanco García, Carmen

Ensaísta e crítica literaria. Profesora de Literatura Galega na Facultade de Humanidades de Lugo da Universidade de Santiago de Compostela. Formou parte do movemento feminista galego dende os seus comezos nos anos setenta e coordina, xunto con Claudio Rodríguez Fer, a publicación libertaria Unión Libre. Cadernos de vida e culturas. Publicou Conversas con Carballo Calero (1989), Carballo Calero: política e cultura (1991), e fixo, en colaboración con Rodríguez Fer, as edicións de Con pólvora e magnolias de X. L. Méndez Ferrín (1989) e de Os eidos de Uxío Novoneyra (1990). Como ensaísta ocupouse especialmente da problemática feminista e libertaria, combinando a temática galega coa universal, e como crítica tratou en particular as relacións entre xénero sexual e literatura, sendo pioneira en Galicia destes estudios. Nesta liña publicou os libros: Literatura galega da muller (1991), Escritoras galegas (1992), Libros de mulleres (1994), O contradiscurso das mulleres (1995), Nais, damas, prostitutas e feirantas (1995), Mulleres e independencia (1995) e El contradiscurso de las mujeres (1997), así como a edición de Códice Calixtino (1991) de Luz Pozo Garza, a tese de doutoramento Imaxes de mulleres na literatura galega contemporánea á luz dos discursos feministas (1994) e a coordinación do monográfico “Mulleres escritoras” nos cadernos Unión libre (1996). Deseñou e ilustrou os poemarios Tigres de ternura (1981), Historia da lúa (1984) e Vulva (1990) de C. Rodríguez Fer, e publicou artigos e estudios en diversos medios xornalísticos e libros colectivos.

Cronoloxía