Bourdieu, Pierre Félix

Sociólogo. Dende 1964 é director da École Pratique des Hautes Études e, dende 1982, profesor titular da cátedra de Socioloxía no Collège de France. A partir de 1975 é director da revista Actes de la recherche en sciences sociales. Comezou a súa traxectoria profesional cunha serie de estudios etno-sociolóxicos sobre a poboación alxeriana: Sociologie de l’Algéria (Socioloxía de Alxeria, 1961) e Travail et travailleurs en Argelie (Traballo e traballadores en Alxeria, 1963). A partir de Les Héritiers (Os herdeiros, 1964), escrito en colaboración con J.C. Passeron, a maior parte da súa obra centrouse no estudo da cultura como medio empregado polo grupo dominante na sociedade para reforzar as diferencias de clase e manter o seu exclusivismo e poder. Tamén en colaboración con J. C. Passeron, escribiu Les étudiants et leurs études (Os estudiantes e os seus estudios, 1964) e La reprodution. Élements pour une théorie de l’educaction (A reprodución. Elementos para unha teoría da educación, 1970). Ocupouse ademais do problema da metodoloxía nas Ciencias Sociais en Le métier de sociologue (O oficio de sociólogo, 1968), tamén con J. C. Passeron. O seu traballo máis importante no eido da estética é La distinction: Critique sociale du jugement (A distinción: Crítica social do xuízo, 1979), no que postulou que o gusto e as necesidades culturais son produto dunha determinada educación, isto é, que existe unha asociación entre os conceptos de clase social e estilo de vida. Finalmente, hai que sinalar a súa contribución ás teorías sistémicas con Les règles de l’art (As regras da arte, 1992), onde desenvolveu a noción de campo literario.

Cronoloxía