Brandenburgo

Land do norte de Alemaña (29.476 km2; 2.573.291 h [estim 1998]). A súa capital é Postdam. Corresponde aproximadamente á rexión histórica de Brandenburgo aínda que a actual land non incorpora Berlín, que polo seu carácter de capital nacional e a súa particular traxectoria durante a segunda metade do s XX (na que permaneceu dividida entre as dúas repúblicas alemanas), forma unha land independente. Está baixo un dominio climático continental moderado, rexistrando unha temperatura media anual de 9,6°C e un total de precipitacións de 667 mm ao ano. As principais actividades económicas baséanse na explotación dos seus recursos naturais, tanto os agropecuarios como os minerais, especialmente os xacementos de carbón vexetal e as industrias químicas e metalúrxicas. Destacan os seguintes núcleos urbanos: Postdam, Brandenburgo e Cottbus. A actual land de Brandenburgo foi creada no ano 1990, cando a República Democrática Alemana se integrou na República Federal de Alemaña para constituír un só estado alemán.