Breslau

Capital do voivodato homónimo, en Silesia, Polonia, situada preto do Oder (642.700 h [1996]). É o centro comercial e industrial máis importante de Silesia, destacando as empresas de maquinaria eléctrica, locomotoras, cervexeiras e de fibras téxtiles artificiais e sintéticas. É un importante nó de comunicacións fluviais e terrestres; ademais, conta cun dos principais aeroportos do país. O equipamento de ensino superior da cidade é a Uniwersytet Wroclawski im Boleslawa Bieruta, fundada en 1945. Entre os monumentos da cidade cómpre destacar a catedral de San Xoán Bautista (ss XIII- XIV), as igrexas góticas e a casa consistorial (ss XIV-XV). A cidade, de orixe eslava, formou parte de Polonia dende finais do s X. No 1335 foi incorporada a Bohemia, para logo pasaren ambas á xurisdición dos Habsburgo no 1526. Cedida a Prusia no ano 1742, foi asediada posteriormente polos franceses entre 1806 e 1807.