Caldo

Río afluente do Limia pola esquerda. Nace na Portela de Home (parroquia de Río Caldo, concello de Lobios), na serra de Santa Cruz, sector occidental da serra do Xurés. O seu curso encáixase sobre unha fractura de dirección NNL-SSO. Drena a parroquia na que nace e á que lle dá nome e alí recibe o seu principal tributario, o Vilameá. Despois serve de límite entre as parroquias de Manín e Lobios, antes de chegar ao límite do concello de Lobios coa parroquia de Galez (concello de Entrimo), onde desemboca logo dun percorrido duns 12 km. O seu réxime é pluvial, acusando unha intensa seca estival. No leito do río, na fractura pola que discorre encaixado, xorden mananciais de augas termais, que son perceptibles durante a estiaxe do verán. Destas caldas vénlle o seu nome.