Carmenta

Divindade latina oriúnda de Arcadia, que, segundo as fontes, recibía os nomes de Nicóstrata, Temis ou Timandra. En Roma foi coñecida como Carmenta, nome derivado do latín carmen ‘canto, poema’, debido a que posuía o don da profecía e da adiviñación. Dependendo da tradición identifícase como nai ou muller de Evandro, que chegou a Roma na súa compaña logo de ser este desterrado da súa patria. As súas festas, chamadas Carmentais (Carmentalia), celebrábanse en Roma.