Carpobrotus

Xénero de herbáceas perennes, da familia das aizoáceas, de talos rastreiros e ramificados de varios metros de lonxitude, follas opostas moi carnosas e de sección triangular, e flores grandes. En Galicia están presentes en xardíns, areais e pedregais costeiros, dúas especies orixinarias de Sudáfrica, empregadas como ornamentais e para fixar dunas ou taludes: C. acinaciformis, de flores de ata 12 cm de diámetro e estaminodios púrpuras, e C. edulis, de flores de ata 8 cm de diámetro e estaminodios amarelos.