Cattleya

Xénero de plantas epifíticas da familia das orquidáceas, de follas coriáceas, longas e estreitas que nacen duns pseudobulbos cilíndricos. As súas flores son grandes e teñen os sépalos similares e os pétalos laterais ovados e ondulados, cun labelo de tres lóbulos (o central estendido e os laterais formando un tubo), de cor xeralmente branca, rosa ou vermella en inflorescencias terminais. Coñécense unhas 50 especies distribuídas polos bosques tropicais americanos. Empréganse en floricultura pola facilidade de cultivo e pola obtención de híbridos entre especies ou con outros xéneros de orquídeas. As especies máis comúns son: C. labiata, de flores de cor rosada cun labelo longo en forma de trompa que se cultiva en invernadeiros sobre cortizas de piñeiro; C. bicolor de labelo e sépalos petaloides de diferente cor, combinando a vermella ou rosa coa amarela ou alaranxada; e C. gullata, de ata 1 m de altura, de grandes sépalos de cor ocre e labelo pequeno.