Celeiro, porto de

Porto do fondo da ría de Viveiro, na súa beira oriental, situado no litoral da parroquia de Celeiro (concello de Viveiro). É base dunha importante flota pesqueira, que ten no Gran Sol e no Atlántico oriental os seus principais caladoiros. A partir desa gran flota de altura desenvolvéronse no lugar outras actividades industriais relacionadas co mar, como as industrias conserveiras e de conxelados de peixe.