Cénit

Revista mensual bilingüe que editou a sociedade Hijas de Galicia entre 1938 e 1960 en La Habana. Subtitulábase “Órgano oficial de Hijas de Galicia” e estaba dedicada ás mulleres, xa que o Centro Gallego de La Habana estaba formado só por homes. Dirixida nun principio por José Álvarez Núñez, e despois por José Álvarez Clark, figuraban como redactoras Amada Borges e Rosa Artiles. Entre os colaboradores figuraban Conchita Rodríguez, Sandra Sánchez, Dámaso Pérez, Ángeles Caíñas e Salvador Lorenzana. Dividíase nas seccións “Salud e Higiene”, “La Cocina”, “Corte y Costura”, “Información Social” e “Antorcha”, na que incluía temas históricos, de efemérides ou semblanzas de figuras galegas como Curros Enríquez, Rosalía de Castro, Emilia Pardo Bazán ou Concepción Arenal. Ocupábase das actividades tanto benéficas como asistenciais da entidade, e informaba sobre os servicios prestados ás mulleres emigrantes e aos seus fillos. Introducía notas de cine, teatro, música e deporte, e tamén editaba informacións breves ou ensaios sobre aspectos da cultura galega.