"Rianxo" (Contén)

Agrupación musical fundada en 1870 que se mantivo en activo ata 1929, ano en que desapareceu. Foi reorganizada e dirixida en 1930 por Perfecto Iglesias Figueroa, con algúns compoñentes da banda vella pero principalmente con novos músicos ensinados por el. Directores posteriores foron José Badín, Marcial Sanjurjo, José Oro Val, Vázquez Gregorio, Francisco Gargallo e Simón Trelles. Na actualidade está dirixida por Rosendo Iborra Jover. En 1945 acadou o II Premio no Certame de Bandas de Santiago de Compostela.

Revista publicada en Bos Aires a partir de 1950. Editada pola “Sociedad Parroquias Unidas Del Ayuntamiento De Rianjo”, incluíu abundante información sobre as actividades culturais e sociais desenvolvidas por esta asociación de emigrantes, así como notas sobre a súa directiva.

Santuario mariano situado en Rianxo. Fundado en 1671 por Alonso Fernández Gastón sobre o antigo santuario de Nosa Señora da Cruz (1561), ten unha soa nave con tribuna superior de madeira e capela maior cuberta con bóveda de nervios e arco triunfal de medio punto. A fachada é barroca e nela destacan os adornos do lintel e o friso da porta, rematada con frontón triangular que acolle unha fornela coa imaxe da Virxe de Guadalupe. No muro consérvanse dous escudos coas armas dos Bastón e Ponte. A súa orixe atópase nunha imaxe da Virxe traída de Extremadura, obra do escultor rianxeiro frei Xosé de Santiago (1773), que se levou á ermida de San Xosé da Floresta. Tras a Guerra da Independencia, a ermida quedou en ruínas pero a imaxe da Virxe conservouse e trasladouse á capela na que se venera. No lugar celébrase a romaría da Virxe de Guadalupe en setembro.

Porto pesqueiro situado na ría de Arousa, no concello do mesmo nome. É un porto mexilloeiro e de pesca de baixura que serve de base a pequenas frotas artesanais. Ten un calado de 3 m, rampas, auga, combustible, talleres e efectos navais de tipo pesqueiro, grúa e iluminación. Conta con instalacións deportivas con capacidade para 83 embarcacións.