compromiso

Obrigación contraída entre persoas por unha promesa, unha palabra dada, etc.

Na literatura, no cine ou en calquera outro medio artístico, tendencia que concibe a obra co obxectivo fundamental de que interveña na transformación da sociedade, desde un punto de vista ideolóxico ou político. Oponse á concepción da “arte pola arte”, que vindica o valor estético das manifestacións artísticas e que lle nega a capacidade de operar cambios na sociedade. No eido literario houbo, ao longo da historia, momentos nos que a implicación dos intelectuais na dinámica socio-política foi máis acusada, como aconteceu no romanticismo (Vic22tor Hugo e Mariano J. de Larra) e no realismo (Èmile Zola). Hai que salientar as achegas de Jean-Paul Sartre á reflexión sobre o papel do escritor na sociedade a través da revista Les temps modernes e do ensaio Qu’est-ce que la littérature? (Que é a literatura?, 1974). Un modelo de literatura comprometida foi a obra dramática de Bertolt Brecht, na que a implicación política e social vinculouse ao pulo renovador de formas e técnicas. Na literatura galega hai múltiples exemplos de compromiso, entre eles cómpre citar a poesía de Celso Emilio Ferreiro, marcada pola oposición á ditadura franquista e pola atención que lles presta aos problemas do seu tempo, ou o posicionamento feminista de autoras como Mª Xosé Queizán, Chus Pato ou Olga Novo.

Contrato especial formalizado en escritura pública polo que as partes dunha controversia estipulan que o conflito existente entre elas sexa resolto por terceiras persoas, unha ou máis en número necesariamente impar, designadas por elas mesmas. As partes teñen o acordo expreso de acatar a súa decisión.

Escritura ou acta na que consta o compromiso das partes a someterse a unha arbitraxe imparcial.

Resolución dun litixio por arbitraxe.

Delegación que, co fin de elixir os ocupantes de determinados cargos civís ou eclesiásticos, fan os electores nun deles ou en máis dun para designar o que debe de ser nomeado para o cargo.

Forma de elección do dereito canónico consistente na circunstancia de que os electores, unanimamente e por escrito, confiran a unhas determinadas persoas o dereito de elixir en nome de todos.