conselleiro -ra

Membro dos órganos superiores de goberno e administración das comunidades autónomas. En Galicia, desempeña unha dobre función: como membro do consello da Xunta de Galicia, que responde solidariamente ante o Parlamento, e como xefe superior dos departamentos ou consellerías nos que se divide a Administración autonómica. Os conselleiros son nomeados e cesados polo presidente da Xunta de Galicia. Entre outras atribucións levan a iniciativa normativa no tocante aos anteproxectos de lei e aos proxectos de decreto en materias propias do seu departamento, en particular os anteproxectos de orzamentos da súa consellería; e funcións administrativas, entre as que destacan a iniciativa e dirección en todos os asuntos e materias relativas ao seu departamento, a proposta, nomeamento e cesamento do persoal, a dirección e inspección dos servicios da consellería, a sinatura dos contratos, convenios e acordos, a disposición dos gastos do departamento, a resolución de recursos administrativos nos casos que legalmente lle corresponda e a resolución dos conflitos de atribucións entre órganos dependentes da súa consellería. Tamén poden designar e cesar libremente o persoal colaborador e de asistencia directa, dentro dos créditos orzamentarios consignados ao efecto. Este persoal de carácter eventual deixará de desempeñar automaticamente o seu cargo ao producirse o cesamento do conselleiro que efectuou o seu nomeamento.

Órgano unipersoal dunha sociedade anónima que conta cun consello de administración que lle delega algunhas das súas facultades con carácter permanente, agás as que resulten indelegables por lei.