crecer

1. v i

   1. Aumentar as súas dimensións un organismo vivo de xeito gradual, particularmente en altura.

      Ex: A súa filla creceu coma unha vara os dous últimos anos. Creceulle moito o cabelo dende que non o vexo.

   2. Aumentar de tamaño ou de volume algunha cousa.

      Ex: O pan xa creceu de abondo e pódese cocer. Cando a lúa crece non é bo sementar.

2. v i

   Incrementar en intensidade, cantidade ou importancia algunha cousa. Na tradición oral recóllense ditos como: “Como crecen os favores, crecen as dores. Non crece o río con auga limpa. O que queira crecer sen se botar a perder, ten moito que saber e que aprender”.

   Ex: As súas preocupacións crecían por momentos. A poboación creceu no último ano. Pensa que creceu a súa importancia desde que é director.

   Sinónimos: aumentar. Antónimos: diminuír.
3. v i

   Criarse ou desenvolverse algunha cousa nalgunha parte, especialmente os vexetais.

   Ex: Moito crecen as silvas na beira do camiño!

4. v i

   Chegar unha persoa á súa madureza intelectual.

   Ex: Cando crezas xa o entenderás.

Frases feitas

• Crecer como a mala herba. Aumentar ou desenvolverse algunha cousa moito máis do conveniente.

• Crecerlle o pelo a alguén. Sacar un gran beneficio dun negocio.