ensaio

Proba que se realiza para determinar as calidades ou características de algo, ou a que se fai antes dun acto ou actividade para verificar que todo sairá ben.

Xénero literario en prosa, non narrativo, que trata dunha maneira libre os problemas máis diversos con vontade de creación, que inclúe obras con estas características. Adopta diferentes formas que van dende a pura divagación ata a disertación sistematizada, o diario íntimo, a epístola e o diálogo. Bautizado por Montaigne nos seus Essais (1580-1595), comezou a impoñerse durante o Renacemento e acadou coa Ilustración, momento de máximo esplendor con Voltaire, Diderot e os filósofos ingleses. Diversificouse e especializouse con obras que nalgúns casos foron punto de partida de novas ciencias: historia (Essai sur les moeurs, de Voltaire, 1756), ciencias sociais (De l’esprit des lois, de Montesquieu, 1748), políticas (Du contrat social, de Rousseau, 1762), economía (Wealth of Nations, de Adam Smith, 1766), psicoloxía (An Essay Towards a New Theory of Vision, de Berkeley, 1709) e ciencias físicas e naturais (Pensées philosophiques, de Diderot, 1746). Co triunfo da Revolución Industrial e a expansión do positivismo, a diferenciación entre ensaio e tratado científico ou erudito foi máis clara. Despois da Segunda Guerra Mundial produciuse un novo florecemento do xénero e un retorno á súa dimensión humanista, como o manifesta a obra de B. Rusell, Sartre e Camus. Ao mesmo tempo, moitos homes da ciencia, filósofos, historiadores, psicólogos, economistas, médicos e sociólogos, sacaron das súas experiencias profesionais hipóteses xerais para unha comprensión e posible transformación do mundo contemporáneo. Tamén se denomina ensaística.

Análise cualitativa simple, feita por medio de reaccións e de técnicas simples e breves. Xeralmente, faise para ter un coñecemento previo da substancia a analizar, e o máis clásico é o do tipo pirognóstico.

Fase central no proceso de realización dun espectáculo teatral en que o director de escena traballa co elenco de actores e con outros creadores como iluminadores, escenógrafos, coreógrafos, maquilladores, xastres ou caracterizadores. Este proceso adoita comezar despois da repartición de papeis e unha vez que o elenco xa ten memorizado o texto. Dependendo da orientación do traballo que haxa que realizar e da fase en que se atope a elaboración do espectáculo, adóitanse distinguir diferentes tipos de ensaio: ensaio por escenas, ensaio completo, ensaio de caracterización, ensaio con escenografía, ensaio de iluminación, ensaio de luces, ensaio técnico, ensaio de orquestra, ensaio de sonorización, ensaio con público, ensaio fotográfico e, finalmente, ensaio xeral, momento en que se ensamblan todos os elementos do espectáculo.

Acción que en rugby, fútbol americano e noutras especialidades similares, consiste en apoiar o balón no terreo de xogo trala liña que está situada á altura da portería do equipo contrario. Esta acción outorga a maior puntuación.

Impresión que se fai para probar a calidade dun deseño antes da elección definitiva.

bioensaio.

Proceso de tenteo polo cal se eliminan progresivamente as respostas erróneas e se fixan as respostas satisfactorias. É a base da aprendizaxe instrumental.