escama

Formación que cobre o corpo de moitos vertebrados e que lles serve de protección. Segundo a súa orixe, as escamas poden ser epidérmicas e dérmicas. As escamas epidérmicas, ou córneas, fórmanse a partir da capa xerminativa da epiderme. Os peixes actuais non as teñen e nos anfibios son moi raras. Nos réptiles hai dous tipos: os ofidios e os sauros teñen escamas aplanadas, imbricadas e con muda completa, e os quelonios e os crocodilos teñen escamas independentes, colocadas unha ao lado da outra e non presentan mudas. Os paxaros só teñen escamas nas patas, e os mamíferos, agás o pangolín e o armadillo, só na cola, nas mans e nos pés. As plumas, o pelame, os esporóns, as uñas, os cornos, etc, son modificacións destas escamas. As escamas dérmicas, ou óseas, fórmanse no derma e son, xa que logo, de orixe mesenquimática. As escamas dos peixes actuais preséntanse de catro formas diferentes: ganoideos, ctenoides, placoides e cicloides, todas cunha orixe semellante, pero con estrutura e forma diferentes. Os ósos de membrana do cranio derivan destas escamas. As escamas dos lepidópteros son pelame modificado, que lles cobren as ás e outras partes do corpo e son as responsables da súa coloración.

Conxunto de escamas.

Termo do latín dos chafoutas, ou xerga dos albaneis, e tamén do verbo dos daordes ou xerga dos telleiros, que corresponde á voz ‘peseta’.