escolopendra

Artrópodo da clase dos quilópodos, de corpo plano e alongado, dividido en numerosos metámeros iguais, normalmente entre 15 e 20, pero nalgunhas especies ata 177, cun par de patas que realizan un movemento simultáneo cando o animal se despraza. A maioría das especies norteamericanas e europeas miden entre 3 e 10 cm, aínda que a especie tropical americana Scolopendra gigantea pode acadar os 26 cm de lonxitude. As patas só están ausentes no primero segmento, convertidas nun par de pezas velenosas. Na cabeza presentan un par de antenas, dous pares de maxilares e ollos dispostos en grupos de ocelos. Son activos predadores que capturan insectos, anélidos e outros cempés, aínda que as especies máis grandes poden atrapar lagartos, roedores e insectos grandes. Son nocturnos e usualmente descansan polo día en lugares húmidos, baixo un leito de follas ou pedras. Teñen unha mordedura máis forte ca a picadura dunha abella; a das especies tropicais de maior tamaño pode ser moi dolorosa, pero rara vez mortal para o home. Propias das rexións tropicais e temperadas, viven no solo e buscan refuxio baixo pedras, cortizas e troncos.