¹ estepa

Planta leñosa, da familia das cistáceas, de follas de limbo enteiro dispostas de xeito oposto, de grandes flores hermafroditas de simetría radial, solitarias ou en cimas pouco espesas, de cáliz de sépalos libres e corola de 5 pétalos que murchan rapidamente, con numerosos estames e un único estilo. Os froitos son cápsulas que abren en forma de estrela, e teñen numerosas sementes de pequeno tamaño. As estepas están localizadas fundamentalmente na área mediterránea, onde constitúen un dos compoñentes fundamentais das matogueiras. En Galicia están presentes en lugares secos: Cistus ladanifer, de ata 3,5 m de altura, con follas que presentan entre 1 e 3 nervios principais, flores solitarias con sépalos de entre 11 a 18 mm de lonxitude e 8 a 13 mm de ancho, pétalos de 30 a 55 mm de lonxitude, a miúdo con manchas vermellas na base, e froitos en cápsulas tomentosas de entre 10 e 16 mm de diámetro; Cistus laurifolius, de ata 2,5 m de altura, follas con 3 nervios principais, sépalos de entre 13 a 18 mm de lonxitude e 6 a 9 mm de ancho, pétalos de 20 a 30 mm de lonxitude, froitos en cápsulas pubescentes de entre 9 a 12 mm de diámetro; Cistus populifolius, de ata 1,5 m de altura, sépalos de entre 10 a 17 mm de lonxitude e 10 a 15 mm de ancho, pétalos de 15 a 30 mm de lonxitude, brancos e coa uña amarela, e froitos en cápsulas globulosas de entre 5 a 7 mm de diámetro; e Cistus salvifolius, de ata 0,7 m de altura, follas cubertas de pelos estrelados, pétalos de 14 a 20 mm de lonxitude e froitos en cápsulas globosas pentagonais de entre 5 a 7 mm de diámetro.