galería

Balcón cerrado con vidreiras construído na fachada exterior dunha casa. A súa construción acadou un gran desenvolvemento en Galicia. A súa orixe atópase nos balcóns, solainas e galerías abertas características da arquitectura tradicional galega do s XVII. A finais do s XVIII comezaron a construírse as primeiras galerías pechadas con cristais. Tiñan a función de permitir o paso da luz ao interior da vivenda e servían de abrigo no inverno e de lugar fresco no verán. No s XIX e comezos do s XX acadaron o maior desenvolvemento e chegaron a converterse en cuartos prolongados da casa. Distínguese entre o miradoiro que cobre unha das portas da fachada, e a galería, que abrangue toda a fronte dunha das plantas do edificio. Como elemento de sostén empréganse as columnas e pilastras. Tradicionalmente, o peche dos balcóns realizábase con madeira e fiestras de mainel. A finais do s XIX os arquitectos modernistas reinterpretáronas e engadíronlles o ferro forxado. As máis relevantes son as situadas no paseo da Mariña na Coruña. Entre os arquitectos que as dotaron dun estilo propio destacan Juan de Ciórraga, Julio Galán Carvajal e Rodolfo Ucha Piñeiro.

Espacio arquitectónico interior sostido por arcos ou columnas, ás veces con vidreiras aos dous lados ou nun só.

Colección de pinturas e outras obras de arte. Poden ser públicas ou privadas, mentres nas primeiras o seu obxectivo é mostrar as obras cun fin expositivo, nas segundas buscan a venda da obra exposta. A súa orixe atópase nas pinacotecas do mundo grego e romano. As coleccións privadas comezaron a ser expostas ao público no s XIX e, dende mediados do século, xeneralizáronse as galerías nacionais. Entre outras cómpre destacar a Alte Pinakothek e a Neue Pinakothek de Múnic, a Galleria Borghese de Roma, a Galleria delle Uffizi en Florencia, o Ermitaxe en San Petersburgo, o Museo del Prado en Madrid, o Rijksmuseum de Amsterdam e a National Gallery de Londres.

Establecemento público, xeralmente de carácter privado, dedicado á exhibición e á venda de obras de arte. Cristalizou na segunda metade do s XIX en París e permitiu o paso do antigo encargo directo á moderna oferta do artista. Está estreitamente unida ao fenómeno do marchante e serviu para que as correntes renovadoras e vangardistas se desen a coñecer. En Galicia existe a Asociación Profesional de Galerías de Arte con sede en Santiago de Compostela.

Lugar destinado ao público en certos espectáculos.

Balcón nos teatros, ao redor da sala, onde se acomodan unha ringleira ou máis de espectadores.

Conxunto de espectadores que asisten a un espectáculo.

Conxunto de xente que pode aprobar ou desaprobar aquilo que se fai en público.

Camiño subterráneo escavado nun lugar, como unha mina, en rochas ou no filón dun mineral, para o acceso á explotación deste.

Conduto subterráneo natural subhorizontal que se atopa nas covas.