intercambio

Acción ou efecto de intercambiar.

Cambio ou permuta de bens e servicios que realizan dúas ou máis persoas, sociedades ou entes entre si.

Fenómeno que, por efecto da turbulencia, ten lugar entre dúas masas de aire. Teñen especial importancia os intercambios de calor, de humidade e de cantidade de movemento.

Acto diplomático constituído por dous ou máis documentos que se dirixen mutuamente aos representantes de dous gobernos. As notas teñen por finalidade constatar o acordo ao que se chega despois dunha negociación previa.

Proceso quimicofísico segundo o cal, ao porse en contacto unha solución iónica cun composto inmiscible de constitución axeitada, que se denomina intercambiador iónico, prodúcese a fixación neste dos catións ou dos anións de dita solución, co cambio, respectivamente, de cantidades equivalentes de catións ou de anións, procedentes do intercambiador, que son liberados do seu retículo e pasan á solución. O intercambio pode ser catónico ou aniónico, segundo o signo da carga dos ións intercambiados. Na práctica, póddese levar a termo o proceso de intercambio iónico segundo dúas técnicas diferentes: operación en baños discontinuos e operación por percolación en columna. Na primeira, engádese unha cantidade de intercambiador na solución e trátase e axítase ata que alcanza o equilibrio entre as dúas fases, de xeito que o intercambio non é nunca total. Pode chegar a selo na operación por percolación en columna, posto que a solución que flúe ao longo dunha columna chea de intercambiador, a medida que vai deixando os seus ións, vai entrando en contacto co intercambiador fresco. Con esta última técnica, o intercambio iónico atopou múltiples aplicacións, a maioría contidas nalgún dos catro grupos seguintes: substitución dun ión determinado por outro, eliminación ou separación dun ión que interfire, análise de substancias presentes en cantidade moi pequena e, finalmente, a separación de ións entre eles ou de substancias de propiedades moi similares, caso en que se inscribe a cromatografía de intercambio iónico.

Substitución mutua de átomos dun mesmo elemento, entre dúas moléculas, pero isotopicamente diferentes. HD + H 2 O ⇋ H 2 + HDO. O emprego de trazadores puxo en evidencia a espontaneidade das reaccións de intercambio isotópico.

Fenómeno fisicoquímico de carácter fundamental que consiste no movemento ou permutación, non resoante, de electróns solitarios e cargas positivas ou negativas, de forma intramolecular, en determinado tipo de substancias orgánicas fortemente cloradas.

Fenómeno que consiste nun cambio entre segmentos equivalentes dunha parella de cromosomas e, polo tanto, de material xenético. Este fenómeno ten lugar durante o entrecruzamento.