Karnak

Complexo arquitectónico construído en Tebas (actual Luxor) en honor da tríade tebana (Ammón-Ra, Mut e Konshu). A partir do Imperio Novo, e concretamente da dinastía XVIII, converteuse no santuario máis importante de Exipto a causa do peso político e relixioso de Ammón no país. Desde entón, e ata a época romana, cada soberano fixo a súa achega, máis ou menos significativa. Tal e como se conserva, aparece dividido en tres áreas: o gran templo de Ammón, Karnak Sur co templo pechado de Mut, e Karnak Norte. O templo de Ammón está formado por unha sucesión de pilonos, ou portas monumentais, separados por patios ou salas, que conducen ao santuario principal. Destacan a gran sala hipóstila de Sethi I e Ramsés II, con 103 columnas colosais, o obelisco de Tuthmosis I e o de Hatšepsut e, por último, a sala de festas, de Tuthmosis III. Karnak Sur comprende, pola súa banda, o lugar sagrado, empregado nas navegacións rituais, e, sobre todo, o templo de Khonsu, do que destacan os seus textos e relevos. Unha avenida de esfinxes leva ao templo pechado de Mut. Karnak Norte alberga o templo pechado de Montu, co santuario desta divindade, de Amenofis III, da deusa Maat, de época ramésida, e o templo alto.