Movemento Cooperativo de Escola Popular galega

Asociación creada en Santiago de Compostela en 1975 co nome de Asociación para a Correspondencia e a Imprensa Escolar, en conexión coa asociación española do mesmo nome, e que despois pasou a denominarse Movemento Cooperativo de Escola Popular Galega. Esta asociación naceu como consecuencia do movemento galeguista que xurdiu no ensino na década de 1970 e avogaba pola renovación pedagóxica, baseada na pedagoxía desenvolvida por Célestin Freinet, desde perspectivas galeguizadoras do ensino. Propugnaba unha escola popular e cooperativa, preferentemente ao servizo dos fillos das clases populares, en que o saber se construía coa participación de todos e cada un dos implicados na educación do neno, tanto no seu ambiente habitual coma no interior da escola. O Movemento editou, entre 1978 e 1981, a revista pedagóxica As Roladas.