petrodólar

Unidade monetaria aplicada aos saldos en dólares que acumularon os países produtores de petróleo polas fortes subas de prezo en 1973 e en 1979 e que ocasionaron importantes desequilibrios nas balanzas de pagamentos do mundo. O enorme volume que acadaron os petrodólares creou, sobre todo a raíz da suba de 1973, o problema de reciclar estes recursos, que se canalizaron cara a unha grande expansión do crédito internacional. De todos os xeitos, o superávit dos países exportadores de petróleo a raíz da suba de 1973 esgotouse xa en 1978, pouco antes da segunda gran suba de 1979. O superávit desta segunda suba xa desaparecera en 1982.