ribosoma

Orgánulo celular que ten por función a síntese de proteínas e, por tanto, un papel de primeira orde no crecemento celular. Atópase abundantemente en todas as células vivas, nas eucariotas, adheridos á superficie externa do retículo endoplasmático rugoso, pero tamén libres no hialoplasma, illados ou dispostos en cadeas de 5 a 40 ribosomas, formando os polisomas. Cada ribosoma está constituído por dúas subunidades corpusculares diferentes, firmemente unidas, formadas por un composto proteico e por unha cadea de ARN ribosómico. A superficie da subunidade máis pequena adhírese ao ARN mensaxeiro, mentres que a máis grande pode adherirse ao retículo endoplasmático rugoso. Os ribosomas participan na síntese proteica lendo os ARN mensaxeiros e, unindo os aminoácidos que corresponden, van formando as cadeas proteicas.