Montserrat

Mosteiro beneditino e santuario da Virxe de Montserrat, situados a 720 m de altitude, na vertente L da montaña de Montserrat, encarado ao Bages. O conxunto das construcións é bastante irregular, a causa do terreo accidentado e das diferentes épocas de edificación. Artisticamente, a parte máis importante é o sector da basílica e do mosteiro. Quedan dúas ás do claustro gótico construído en 1476. A fachada principal do mosteiro dá paso ao atrio da basílica, formado polo claustro do abade Argeric (s XVIII). Unida a unha parede lateral está a portada románica da antiga igrexa do s XII. A basílica foi consagrada en 1592 e a súa fachada principal tivo que ser reformada despois da Guerra da Independencia (1808-1814). A nave central, cuberta con arcos góticos redondeados, ten seis capelas a cada lado. A imaxe, coñecida como la Moreneta pola cor escura da cara e das mans, é unha talla policromada de finais do s XII ou de principios do s XIII. Do interior do mosteiro cabe salientar a Sala Gótica, o claustro neorrománico, de dous andares e o refectorio do s XVII. A biblioteca contén un fondo duns 250.000 volumes, uns 400 incunables, máis de 200 papiros exipcios, gregos e coptos; e 2.000 manuscritos, latinos, cataláns, casteláns, hebreos, árabes e sirios, dos que cómpre nomear o Llibre Vermell.